Упрощенная HTML-версия
қапты. Бiр жерде ол әзер еңкейiп, бiр сабақтың басын бырт еткiзiп үзiп ап, алақанымен
уқалап жiберiп, аршылған дәндi аузына салып көрiп едi, сүт дәмi кете бастаған екен.
Қабыршағы қап-қатты. Ол iштей биыл көп астық болғалы тұрғанын сезiп қуанды. Сол
арада бiр түйткiл шаншудай қадалып, кетпей тұрып алды. Мына қалпымен өзi егiн
жиналып бiтем дегенше, бар күнәсiн көлденең көзден жасырып тұра алмайды. Содан
кейiн жағдайы не болады? Үйiнде отырып босана қалса, ел-жұрт мазақтап күлмей ме?
Әлде Елекеш осы тығырықтан бiр амалын тауып, мұны, әбiрейiн төкпей алып шығар ма
екен? Набат содан дәмеленгендей, өз-өзiнен ақырын күлiмсiреп қойды. Алға карай бiр-
екi аттай бере, үй жанына келiп тоқтаған директордың машинасын көрдi. Сол екен,
есiне әлденеге Тоқшылық түстi. Осы қара сұр жiгiттiң анада айтқан өтiнiшiне неге
iркiлiп, қобалжи түскенiне өзi әлге дейiн қайран. Сонда неде болса деп, көздi жұмып
жiберу керек екен. Қалған нәрсенiң бәрiн оның отбасына барғаннан кейiн көрiп алатын
едi. Бiрақ бiр түйткiл мұны сол бiр батыл қадамнан iрке бердi. Әлдеқандай дәме кеуiлiн
алаңдатып, әлi де өмiрдiң ащы-тұщысын татып үлгермеген Тоқшылықтан гөрi, мұның
бар ықылас-ниетiн жалынан ұстауға толымды Елекешке қарай ие бердi. Өз ойынша,
онымен қандай қиын жағдайдан да қорықпай, көздi жұмып, тәуекел етуге әбден
болады. Өзi бiр көруге әдемi. Мiнезi салмақты. Ақыл-есi бүтiн. Оның үстiне соңғы
кездерi есiп келе жатқан азамат. Ондай кiсiнiң әйелi болдым дегенше, қолыңды жылы
суға малдым дей бер. Арадағы он шақты жылдай жас айырмашылығы дәнеме де
етпейдi. Қайта бұл соны бұлдап, ертерек шашына ақ түсе бастаған еркектi өзiне
елiктiрiп, тарта түсiп, басқаларға көз қырын тастап, қызғандырып, өз құнын арттырып
жүре бередi. Содан кейiн ол бұдан кетiп көрсiн. Бiр әйелден айрылған кiсi екiншi рет
ондай қадам баспайды. Соны есептеген Набат Елекештiң мойнына қыл арқанды мықтап
салдым ғой деген-дi. Мына iшiндегi нәресте iңгәлап дүниеге келсе, ол бұдан қалайша
қол үзiп кете алады? Жаны үшiн мұның етегiне шырмалып жүрмей ме? Тақа болмай
бара жатса, бұл дау шығарып, өзiн аямаған кiсiнiң абыройын төгiп, екi аяғын көктен
келтiредi. Тек мұны өткенде Елекештiң екiқабат екенiн айтқанында, шошып кеткенi
тiксiндiрiп тастады. Онысы несi деп, өзiнше бiрнеше рет сараптап бақты. Бiрақ
толымды жауап таба алмады. Өз есебi бойынша, ол шошымауға тиiс едi. Бұ қалай, деп,
Набат кәзiрде де ойланып келедi.
Ол бiр тұсқа келгенде шаршап, тiзесi дiрiлдеп арықтың жиегiне отыра кеттi. Уһ деп
демiн алды. Сосын сынып бара жатқан басын қолымен қыса ұстап, екi самайын уқалай
бастады. Сонда да болар емес. Ол дел-сал қалпы, кайтадан Тоқшылық жайлы ойлады.
Ендi оның бұған жоламасы анық. Әуелгiде ол кәдiмгiдей елiгiп, бұның үйiне келгiштеп
жүрдi де, неге екенi белгiсiз, бiрте-бiрте салқын тартты. Қай жерден бұлардың
арасындағы байланысты бiлiп қалды, — ол кәзiр Набаттың есiнде жоқ. Анада Әбдудiң
үйiнде қонақта бiрге болғанда Тоқшылық екеуi билеп жүрiп, ұрланып, Елекешке
бiрнеше рет көз тастаған. Оның бұдан мұны қызғанып, бiр түрлi боп алабұртып
отырғанын байқаған. Сол арада Набат қай жағына шығуды ойлаған. Кәзiр мына жас
жiгiтке бар ықылас-ниетiн бере салса, Елекештiң өзiнен мүлдем қол үзiп кетуi мүмкiн.
Одан кейiн ол бұған қайрыла қоймайды. Қайрылса да, өзiне қиын болады. Набат кеше
ғана бiрге оқыған жiгiттi алдап, қалай күнә жасайды? Ол мүмкiн емес қой! Сол арада
өзi айнала берiп, жан-жағында дөңгеленiп қалып бара жатқан жиһаздарды, төрт
қабырғаны, шам жарығында жарқ-жұрқ еткен хрустальдарды айқын көрiп, көзiнiң алды
ұшқындап, үстел басында отырғандарға бiр-бiр көз тастаған-ды. Қимыл кезiнде
кiсiлердiң бет пiшiнi өзгерiп кетедi екен. Әне, Әбдудiң бетi жалпайып, күлгенде аузы
созылып кеткен сықылды. Үнсiз отырған Елекештiң түрiнде мұң бар секiлдi. Соған
алақтап айнала бергенiнде, Тоқшылық аяғын басып кетiп, шоңқиды да қалды. Бұл
ақсаңдап, орындыққа әзер жеттi. Жанына кешiрiм сұрап келген оған назар аудармады.
Көз қиығымен Елекештi бақты. Ол бұған бiр түрлi мүсiркеп қарағандай екен. Соны
көрiп, Набат нық шешiмге келген. Ендi неде болса, директордың етегiнен ұстайды.
Тоқшылық iзiнен қалмай жатса, оны көредi. Болмаса, осы бекiнгенi бекiнген. Азар